दैलेख । प्रतिनिधिसभा सदस्य निर्वाचन अन्तर्गत दैलेखका दुई वटै क्षेत्रमा मतदान शान्तिपूर्ण रूपमा सम्पन्न भएको छ। बिहीबार सम्पन्न निर्वाचनमा जिल्लाभर करिब ४४.५४ प्रतिशत मत खसेको छ।
जिल्ला निर्वाचन अधिकारी नरबहादुर सलामीका अनुसार दैलेख जिल्लामा ७१ हजार ८ सय १३ जनाले मतदान गरेका छन्।
उहाँका अनुसार दैलेख निर्वाचन क्षेत्र नम्बर १ मा ३७ हजार ७ सय ५६ मत खसेको छ। उक्त क्षेत्रमा २० हजार ८ सय १५ पुरुष र १६ हजार ९ सय ४१ महिला मतदाताले मतदान गरेका छन्।
त्यसैगरी निर्वाचन क्षेत्र नम्बर २ मा ३४ हजार ५७ मत खसेको छ। जसमा १८ हजार ६ सय ६९ पुरुष र १५ हजार ३ सय ८८ महिला मतदाताले मतदान गरेका छन्।
जिल्ला निर्वाचन कार्यालय दैलेखका अनुसार दैलेखमा स्थायी र अस्थायी गरी कुल १ लाख ६१ हजार २०४ मतदाता रहेका छन्। जसमध्ये ८१ हजार ९९ पुरुष र ८० हजार १ सय ५ महिला मतदाता छन्।
बिहान ७ बजेदेखि सुरु भएको मतदान साँझ ५ बजेसम्म जिल्लाका २ सय १० मतदान स्थलबाट सम्पन्न भएको थियो।