दैलेख।दैलेखको ठाँटीकाँध गाउँपालिका–६ अंगलडाँडामा चक्कु प्रहार गरी फरार भएका बिराट भण्डारीलाई प्रहरीले अन्ततः नियन्त्रणमा लिएको छ।
ठाँटीकाँधकै छडाथान जंगलमा रातभर लुकेर बसेका भण्डारीलाई आइतबार बिहान प्रहरीले पक्राउ गरेको हो। शनिबार अंगलडाँडामा स्थानीय अर्जुन रोकाय र लेलिन थापालाई चक्कु प्रहार गरी घाइते बनाएपछि उनी फरार भएका थिए।
ईलाका प्रहरी कार्यालय दुल्लु र प्रहरी चौकी ठाँटीकाँधबाट खटिएको टोलीले घटनालगत्तै खोजी कार्य तीव्र बनाएको थियो। पक्राउ परेका भण्डारी र उनका एक साथीलाई थप अनुसन्धानका लागि जिल्ला प्रहरी कार्यालय दैलेख पठाइएको प्रहरीले जनाएको छ।
प्रहरीको प्रारम्भिक अनुसन्धानअनुसार भण्डारीले शुक्रबार राति आफूलाई कुटपिट गरी घरमै पुगेर धम्की दिएको भन्दै उक्त घटना घटाएको बताएका छन्।
घाइतेहरूको कर्णाली केयर अस्पताल, सुर्खेतमा उपचार भइरहेको छ र उनीहरूको अवस्था सामान्य रहेको प्रहरीले जनाएको छ। घटनाबारे थप अनुसन्धान भइरहेको दैलेख प्रहरीले जानकारी दिएको छ।