सुर्खेत। सुर्खेतमा एम्बुलेन्स चालकमाथि कुटपिट गरी एम्बुलेन्समा तोडफोड गर्ने घटनामा संलग्न ३ जनालाई प्रहरीले पक्राउ गरेको छ।
जिल्ला प्रहरी कार्यालय सुर्खेतका अनुसार, चैत ६ गते राति करिब १२:०५ बजे वीरेन्द्रनगर नगरपालिका–११ साटिखोला क्षेत्रमा बिरामी लिएर नेपालगञ्जतर्फ जाँदै गरेको एम्बुलेन्सलाई केही व्यक्तिहरूले रोकेका थिए। उक्त एम्बुलेन्स सल्याण कुमाख गाउँपालिका–३ का ३२ वर्षीय चालक वसन्त शर्माले चलाएका थिए।
प्रहरीका अनुसार, एम्बुलेन्स रोकेर चालकमाथि कुटपिट गर्नुका साथै एम्बुलेन्समा समेत तोडफोड गरिएको थियो। घटनापछि चालकले इलाका प्रहरी कार्यालय छिन्चुमा जानकारी गराएका थिए। सूचनापछि प्रहरी टोली घटनास्थलमा खटिए पनि तत्काल संलग्न व्यक्तिहरू फेला नपरेका थिए। पछि पुनः चालकले एम्बुलेन्सको पछाडिको सिसा फुटाइएको जानकारी दिएपछि प्रहरीको टोलीले खोजतलास तीव्र पारेको थियो।
प्रारम्भिक अनुसन्धानका क्रममा संलग्न तीन जनालाई नियन्त्रणमा लिई इलाका प्रहरी कार्यालय छिन्चु, सुर्खेतमा राखी थप अनुसन्धान भइरहेको प्रहरीले जनाएको छ।
पक्राउ पर्नेहरूमा वीरेन्द्रनगर नगरपालिका–११ का २० वर्षीय प्रविण गहतराज, ऐ. का १८ वर्षीय विशाल विक र १९ वर्षीय विशाल विक रहेका छन्।
प्रहरीले घटनाबारे थप अनुसन्धान जारी रहेको जनाएको छ।